बालेन शाहले आज प्रधानमन्त्रीको शपथ लिँदै

वीरगंज, १३ चैत । मुलुकले आज नयाँ प्रधानमन्त्री पाउने भएको छ।

राष्ट्रपति रामचन्द्र पौडेलले आज दिउँसो राष्ट्रपति कार्यालय शीतल निवासमा आयोजना हुने विशेष समारोहका बीच राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) लाई पद तथा गोपनीयताको शपथ गराउने कार्यक्रम तय भएको छ।

​शपथ ग्रहणअघि नेता शाहलाई नेपालको संविधानको धारा ७६ को उपधारा (१) बमोजिम बहुमत प्राप्त एकल सरकारको प्रधानमन्त्रीमा नियुक्त गरिएको औपचारिक जानकारी गराइने राष्ट्रपति कार्यालयले जनाएको छ।

​अपराह्न आयोजना हुने उक्त समारोहमा विभिन्न राजनीतिक दलका नेता, कूटनीतिक नियोगका प्रतिनिधि, नागरिक समाज र उच्च सरकारी अधिकारीहरूलाई आमन्त्रण गरिएको छ। प्रधानमन्त्रीको शपथसँगै नयाँ मन्त्रिपरिषद्का सदस्यहरूको पनि शपथ गराउने तयारी गरिएको बुझिएको छ।

​गत फागुन २१ गते सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टीले १८२ सिटसहित स्पष्ट बहुमत हासिल गरेको थियो। सोही दलले बिहीबार मात्रै नेता शाहलाई संसदीय दलको नेता चयन गरेको हो।

​निर्वाचनमा झापा क्षेत्र नम्बर ५ बाट ६८ हजार ३४८ मत प्राप्त गरी विजयी हुनुभएका शाहसहित नवनिर्वाचित सांसदहरूलाई बिहीबार नै ज्येष्ठ सदस्य अर्जुननरसिंह केसीले पद तथा गोपनीयताको शपथ गराइसकेका छन् ।